तुम्ही कारशेड अडवा, आम्ही बुलेट ट्रेन ; बुलेट ट्रेनविरोधात शिवसेनेचे डावपेच!

CM Uddhav Thackeray - PM Narendra Modi - Bullet Train

मुंबई : मुंबई मेट्रोच्या कारशेडवरून भाजप-शिवसेनेमध्ये (Shiv Sena) शाब्दिक आणि डावपेचांचे युद्ध सुरू असताना आता या वादात ठाणे महापालिकेनेही उडी घेतली आहे. मुंबई-अहमदाबाद हायस्पीड रेल्वे म्हणजेच बुलेट ट्रेन प्रकल्पासाठी शीळ येथील ठाणे महापालिकेच्या मालकीचा ३८४९ चौरसमीटरचा भूखंड देण्यास नकार देण्यात आला आहे. तसेच जमीन हस्तांतरणाचा प्रस्ताव दफ्तरबंद करण्याचेही निर्देश ठाण्याचे महापौर नरेश म्हस्के (Naresh Mhaske) यांनी बुधवारी पालिका सभागृहाच्या ऑनलाइन बैठकीत दिले.

बुलेट ट्रेन (Bullet Train) प्रकल्प पंतप्रधान नरेंद्र मोदी (PM Narendra Modi) यांचा महत्त्वाकांक्षी प्रकल्प आहे. बुलेट ट्रेनला या नव्या घडामोडीमुळे ब्रेक लागण्याची चिन्हे आहेत. ठाण्यातील शेतकऱ्यांचा विरोध हळूहळू कमी झाल्याने बुलेट ट्रेन प्रकल्पाच्या भूसंपादनास गती मिळाली होती. नॅशनल हायस्पीड रेल कॉर्पोरेशनच्या (National High Speed ​​Rail Corporation) माध्यमातून तयार होणाऱ्या या प्रकल्पासाठी ठाणे, भिवंडी तालुक्यातील भूसंपादन प्रक्रिया अंतिम टप्प्यात आली आहे. मुंबईपासून भूमिगत असलेला हा प्रकल्प शिळफाटा येथून उंच पुलावरून मार्गक्रमण करणार आहे. ठाणे महापालिकेची शिळची जागा मिळवण्यासाठी महसूल विभागाकडून पत्रव्यवहार करण्यात आला होता. शिवसेनेने प्रकल्पास विरोध दर्शवत बुलेट प्रकल्पास जागा देण्याचा प्रस्ताव रोखला होता. डिसेंबर महिन्याच्या सर्वसाधारण सभेमध्ये हा प्रस्ताव मांडण्यात आला. केंद्राचा प्रकल्प असल्याने भाजपकडून ‘बुलेट’ प्रस्तावास अधिक जोरदार समर्थन होईल, अशी अपेक्षा होती. मात्र सभेमध्ये भाजप सदस्यांनी आग्रही मागणी लावून धरली नाही. त्याबद्दल आश्चर्यही व्यक्त करण्यात आले. सचिवांनी हा प्रस्ताव मांडताच, ‘आम्ही तो फेटाळून लावत आहोत, तो दफ्तरी जमा करावा आणि परत येता कामा नये’, असे तडक निर्देश महापौरांनी दिले. एकीकडे सार्वजनिक वाहतूक सक्षम करण्यासाठी केंद्राकडून २०० बससाठी निधी मागायचा आणि दुसरीकडे केंद्राचा महत्त्वाकांक्षी प्रकल्प अडवून धरायचा, ही शिवसेना व महापौरांची दुटप्पी भूमिका आहे. मुंबईनंतर आता ठाण्यातही त्याला सुरुवात झाली आहे, असा आरोप भाजपचे (BJP) गटनेते संजय वाघुले (Sanjay Waghule) यांनी नंतर केला.

‘बुलेट’साठी झाले होते रेखांकन बदल

ठाण्यातील शिळफाटा येथील जमीन ठाणे महापालिकेने ४० मीटर विकास रस्त्यासाठी आरक्षित केली आहे. शिळफाट्याची वाहतूककोंडी दूर करण्यासाठी एमएमआरडीएच्या माध्यमातून इथे एका उड्डाणपुलाच्या कामाचे नियोजन करण्यात आले होते. परंतु बुलेट प्रकल्प दाखल झाल्याने उड्डाणपुलाचे रेखांकन बदलण्यात आले. एमएमआरडीएकडून (MMRDA) यासाठी पर्यायी नियोजन करून ही जागा बुलेट प्रकल्पास देण्यास हरकत नसल्याचेही कळवले गेले. ठाणे महापालिकेकडून ही जागा बुलेट प्राधिकरणाला देण्याची केवळ औपचारिकता बाकी होती. यापूर्वी बुलेट स्थानकासाठी महापालिकेने आरक्षणबदलही केले होते तसेच नियोजित रस्ते विस्तारीत करून बुलेटचा मार्गही प्रशस्त केला होता. परंतु मुंबईतील मेट्रोच्या वादानंतर फासे उलटे फिरले.

बातम्यांच्या अपडेटसाठी लाईक करा आमच्या फेसबुक पेजला

MT LIKE OUR PAGE FOOTER