उपवासाची पाणीपुरी

panipuri

पाणीपुरी हा सर्वांचाच आवडीचा पदार्थ आहे. पण सध्या श्रावण महिना सुरु असल्याने व्रत वैकल्ये आणि उपवास आलेच की.. मघ अश्यात पाणीपुरीला देखील दांडी मारावी लागते. मन मारून उपवासाचे पदार्थ खावे लागतात. तेच साबुदाणा खिचडी आणि फळं. आता तर वेगवेगळ्या रेसिपीही करून बघितल्या जातात. उपवासाची इडली, आप्पे, डोसे यात आलेच. मात्र पाणीपुरीचा स्वाद तर पाणी पुरी खाऊनच मिळेल ना…पण उपवासामध्ये ते कसं खाता येणार??म्हणून आजची रेसिपी खास पाणीपुरी प्रेमींसाठी आहे…ते म्हणजे ‘उपवासाची पाणीपुरी’…आता बनवा घरीच आणि खा बिंदास….

साहित्य :- उपवासाची पाणीपुरी

  • ३/४ कप वरीचा तांदूळ
  • २ टेस्पून शाबुदाना पीठ
  • चवीपुरते मिठ
  • क्लब सोडा वॉटर (प्यायचा सोडा)
  • तळण्यासाठी तेल

कृती :-  वरीचे तांदूळ, शाबुदाना पीठ आणि मिठ एकत्र करावे. त्यात सोड वॉटर घालून एकदम घट्ट भिजवावे. सुती कपडा पाण्याने भिजवून घट्ट पिळून घ्यावा. भिजवलेला गोळा या कपड्याने १५ ते २० मिनीटे झाकून ठेवावे.  नंतर भिजवलेल्या पिठाचे करवंदाएवढे छोटे गोळे करावे आणि ते गोळे कोरडे पडू नयेत म्हणून ओल्या फडक्याखाली ठेवून द्यावे. तेल मध्यम आचेवर तापवावे. गोळे लाटून पुर्‍या तळाव्यात. तेल खुप गरम किंवा खुप कोमट नसावे. मध्यम आचेवर तेल तापवावे. पुर्‍या तळल्यावर जाळीच्या रॅकवर तेल निथळण्यास ठेवाव्यात. या रॅकच्या खाली एकादे ताट ठेवावे म्हणजे निथळलेले तेल ताटात जमा होईल. पुर्‍या शक्यतो कुरकूरीत राहातील. पण जर राहिल्या नाहीत तर बेकिंग ट्रे मध्ये पुर्‍या पसरवाव्यात. ओव्हन २०० F (९३ C) वर प्रिहीट करावा, बेकिंग ट्रे मधल्या रॅकवर ठेवावा आणि साधारण १० मिनीटे पुर्‍या बेक कराव्यात. बेक केल्यावर पुर्‍या नक्की कुरकूरीत राहतील.

स्टफिंग साठी :- उकडलेला बटाटा त्यात मीठ हिरवी मिरची जिरे पेस्ट घालून कालवून घालावे. खारे शेंगादाणे. उपासाची शेव.

पाणी पुराचे पाणी साठी साहित्य :- panipuri-pani

  • अर्धा कप चिंच
  • ४-५ टेस्पून किसलेला गूळ
  • १०-१२ खजुर
  • ६-७ हिरव्या मिरच्या
  • २ टिस्पून जिरेपूड, मीठ

कृती :- चिंच पाण्यात भिजत घालून चिंचेचा कोळ करावा. खजूर ४-५ तास कोमट पाण्यात भिजवावे. बिया काढून मिक्सरमध्ये पेस्ट करून घ्यावे.हिरव्या मिरच्या मिक्सरमध्ये बारीक कराव्या. ४-५ भांडी पाण्यात चिंचेचा कोळ, गूळ, खजूराची पेस्ट, मिठ, मिरचीची चटणी, जिरेपूड सर्व मिक्स करावे. आता बनविलेल्या पुऱ्या मध्ये आंबट गोड पाणी भरून पाणीपुरीचा   आस्वाद घ्यावा.