पुलवामा हल्ल्यातील आत्मघाती हल्लेखोराला मदत करणारा अटकेत

नवी दिल्ली :- पुलवामा हल्ल्यात हात असलेल्या जैश-ए-मोहम्मद या पाकिस्तानी दहशतवादी संघटनेच्या एका दहशतवाद्याला राष्ट्रीय तपास संस्थेने (एनआयए) अटके केली आहे. शकीर बशीर मगरे (22) असे या अटक करण्यात आलेल्या दहशतवाद्याचे नाव आहे.

फर्निचर शॉपचा मालक असलेल्या शकीरने पुलवामा हल्ल्यातील ‘सुसाइड बॉम्बर’ आदिल अहमद दार याला आपल्या घरात आश्रय दिला होता. तसेच आयईडी बनवण्यातही मदत केली होती. शकीर हा पुलवामातील काकापोरा येथील हाजीबालचा राहाणारा आहे.

आत्मघाती हल्ला करणारा दहशतवादी आदिल अहमद दारला सर्वप्रकारची मदत शकीरने केली होती. शकीरच्या अटकेने या हल्ल्याबाबत महत्त्वाची माहिती एनआयएच्या हाती येण्याची शक्यता आहे. शकीरचा पुलवामा हल्ल्यात सक्रिय सहभाग होता. हा आदिल आणि पाकिस्तानी दहशतवादी मोहम्मद उमर फारूख या दोघांना पुलवामा हल्ल्याच्या आधी २०१८ पासून आपल्या घरात आश्रय दिल्याची कबुली शकीरने दिली असल्याचे एनआयएने म्हटले आहे. शकीरला न्यायालयात हजर करण्यात आले असता १५ दिवसांची कोठडी देण्यात आली आहे. दरम्यान, फेब्रुवारी २०१९ मध्ये पुलवामा येथे सीआरपीएफच्या ताफ्यावर दहशतवादी हल्ला करण्यात आला होता. आयईडी स्फोटात ४० जवान शहीद झाले होते.