हिवाळी अधिवेशन नागपूर ऐवजी होणार मुंबईत

Vidhan Sabha

मुंबई :- राज्यातील करोनाची स्थिती लक्षात घेता ७ डिसेंबर २०२० पासून नागपूर येथे होणारे हिवाळी अधिवेशन (Winter session) मुंबईत घेण्याचा निर्णय कामकाज सल्लागार समितीच्या बैठीकीमध्ये घेण्यात आला. मुंबईत विधानभवनात दोन्ही सभागृहाच्या विधिमंडळ कामकाज सल्लागार समितीची बैठक झाली.

हिवाळी अधिवेशन दरवर्षी नागपूर होते. पण सध्याची राज्यातील करोनाची (Corona) परिस्थिती पाहता, ते नागपूरऐवजी मुंबईत घेण्याचा निर्णय घेण्यात आला आहे. ७ डिसेंबर २०२० रोजी अधिवेशन घेता येईल का? किती दिवस घ्यायचे? याबाबत या महिन्याच्या शेवटच्या आठवड्यात पुन्हा कामकाज सल्लागार समितीची बैठक घेऊन निर्णय घेण्यात येणार आहे.

बैठकीत हिवाळी अधिवेशनासाठी लागणाऱ्या सुविधांचाही आढावा घेण्यात आला. अनेक विधिमंडळ सदस्यांनी नागपूर (Nagpur) येथे कोविडच्या पार्श्वभूमीवर हिवाळी अधिवेशन घेणे उचित होणार नाही, असे मत व्यक्त केले.

बैठकीत विधानपरिषद सभापती रामराजे निंबाळकर, विधानसभा अध्यक्ष नाना पटोले, मुख्यमंत्री उद्धव ठाकरे (Uddhav Thackeray), उपमुख्यमंत्री अजित पवार (Ajit Pawar), विधानपरिषदेच्या उपसभापती डॉ. नीलम गोऱ्हे, विधानसभेचे उपाध्यक्ष नरहरी झिरवाळ, विधानपरिषदेचे विरोधी पक्षनेते प्रवीण दरेकर, विरोधी पक्षनेते देवेंद्र फडणवीस (व्हिडीओ कॉन्फरन्सद्वारे) संसदीय कार्यमंत्री ॲड. अनिल परब, महसूल मंत्री बाळासाहेब थोरात, मंत्रिमंडळातील सदस्य, विधानसभा आणि विधानपरिषद सदस्य, विधान मंडळाचे सचिव राजेंद्र भागवत, संबंधित अधिकारी उपस्थित होते.

‘करोनाच्या वातावरणात मुंबईतून आणि राज्यातून हजारो लोक अधिवेशनासाठी नागपूरला येणे धोक्याचे आहे’, असा सूर नागपुरमध्ये उमटत असल्याचे काही मंत्र्यांनी सांगितले होते. अधिवेशनासाठी कागदपत्रे, मनुष्यबळ नागपूरला हलवणे आणि तेथे येणाऱ्या अभ्यागतांची मोठी संख्या याचा ताण नागपूरवर पडू शकतो. त्यामुळे अधिवेशन मुंबईतच घ्यायचे की नागपूरला यावर कामकाज सल्लागार समितीच्या बैठकीत लवकर निर्णय घ्यावा असे ठरले होते.

बातम्यांच्या अपडेटसाठी लाईक करा आमच्या फेसबुक पेजला

MT LIKE OUR PAGE FOOTER