‘करोनावर विजय पताका फडकविण्याच्या दिशेने देश अग्रेसर’: राज्यपाल

Governor
  • धारावी येथील करोना नियंत्रणाचे शिलेदार सहायक आयुक्त किरण दिघावकर यांसह करोना योद्ध्यांचा राज्यपालांनी केला सत्कार
  • पार्श्वगायिका पलक मुच्छल, गायक शान, अभिनेते अली फजल यांची उपस्थिती

जर्मनी, फ्रांस यांसह काही देशात करोनाची दुसरी लाट आली असून काही भागात नव्याने लॉकडाऊन जाहीर झाले आहे. मात्र डॉक्टर्स, नर्सेस, समाजसेवी संस्था, संशोधक व परोपकारी व्यक्ती यांच्या सामुहिक प्रयत्नांमुळे भारत करोनावर विजय पताका फडकविण्याच्या दिशेने सातत्याने वाटचाल करीत आहे, असे प्रतिपादन राज्यपाल भगतसिंह कोश्यारी यांनी आज येथे केले.

धारावी तसेच इतरत्र येथे करोना प्रकोपाच्या काळात समाजकार्य करणाऱ्या करोना योद्ध्यांचा राज्यपाल कोश्यारी यांच्या हस्ते राजभवन येथे सत्कार करण्यात आला, त्यावेळी ते बोलत होते. भामला फाउंडेशन या संस्थेच्या वतीने करोना योद्ध्यांच्या या सत्कार सोहळ्याचे आयोजन करण्यात आले होते.

सेवा हा शब्द बोलण्यास अतिशय सोपा आहे; परंतु सेवा करणे अतिशय कठीण आहे. मात्र भारतातील डॉक्टर्स, परिचारिका व इतर समाजसेवकांनी करोना काळात समाजाच्या रूपाने आपण प्रत्यक्ष भगवंताची सेवा करीत आहो, या भावनेने कार्य केल्याचे राज्यपालांनी सांगितले.

‘धारावी करोना नियंत्रण : लोकसहभागाचे उदाहरण’

धारावी येथील करोनाची बिकट स्थिती सामुहिक प्रयत्नांतून नियंत्रणात आणल्याबद्दल राज्यपालांच्या हस्ते मुंबई महानगर पालिकेचे सहायक आयुक्त किरण दिघावकर यांचा यावेळी सत्कार करण्यात आला.

शासन कार्यासोबतच लोकसहभाग तसेच अशासकीय संस्थांचे योगदान यामुळे धारावी येथील करोना संसर्ग नियंत्रित करणे शक्य झाले असे दिघावकर यांनी यावेळी सांगितले.

उदयपुरचे युवराज लक्ष्यराज सिंह मेवाड, बांधकाम व्यावसायिक तसेच शिक्षण संस्था चालक निरंजन हिरानंदानी, पार्श्वगायक शान व गायिका पलक मुच्छल, अभिनेते अलि फजल व भामला फाउंडेशनचे अध्यक्ष आसिफ भामला यावेळी प्रामुख्याने उपस्थित होते.

नानावटी रुग्णालयाचे डॉ समद अन्सारी, हिरानंदानी रुग्णालयाचे मुख्याधिकारी डॉ सुजित चटर्जी, विजय कारिया, सायन रुग्णालयाचे अधिष्ठाता डॉ. मोहन जोशी, कमल खुशलानी, विनीत गौतम, त्रिवनकुमार कर्नानी, रोमांचक अरोरा, निक्सन जोसफ, नेल्सन कोएल्हो, बैद्यनाथचे आयुर्वेदचे अध्यक्ष सिद्धेश शर्मा, आर डी नॅशनल कॉलेजच्या प्राचार्या डॉ. नेहा जगतियानी, समाजसेवी एहसान गडावाला, अनुराग कत्रियार, धारावी पोलीस स्टेशनचे वरिष्ठ पोलीस निरीक्षक रमेश नागरे यांच्या यावेळी करोना काळातील कार्याबद्दल सत्कार करण्यात आला.

बातम्यांच्या अपडेटसाठी लाईक करा आमच्या फेसबुक पेजला

MT LIKE OUR PAGE FOOTER