मतदारवर्ग घसरल्याने, आत्मविश्वास गमावल्याने शिवसेनेला खमंग ढोकळ्याची आठवण – आशिष शेलार

Ashish Shelar-Uddhav Thackeray

मुंबई : शिवसेनेने (Shiv Sena) मराठी मतदारांव्यतिरिक्त आता गुजराती मतदारांना साद घालण्यासाठी शिवसेना गुजराती बांधवांचा मेळावा आयोजित करणार आहे. या मेळाव्यासाठी ‘मुंबई मा जलेबी ना फाफडा, उद्धव ठाकरे (Uddhav Thackeray) आपडा’ अशी टॅगलाईन वापरली जात आहे.

याच मुद्द्यावरून भाजप (BJP) नेते आशिष शेलार (Ashish Shelar) यांनी शिवसेनेला टोला हाणला आहे. दिवसेंदिवस शिवसेनेचा पायाखालचा मतदारवर्ग घसरत चालल्याने कृत्रिम वलय तयार केलं जात आहे. शिवसेनेने आत्मविश्वास गमावला, म्हणून त्यांना खमंग ढोकळा आठवला, अशी खरमरीत टीका भाजप नेते आशिष शेलार यांनी केली आहे.

तसेच, भाजपने कोअर कमिटीच्या बैठका सुरू केल्या आहेत. यावर शेलार म्हणाले, भाजपच्या कोअर कमिटीची बैठक हा नियोजित कार्यक्रम आहे. ही आमच्या पक्षाची कामाची पद्धत आहे. ग्रामपंचायत निवडणुकीचा (Gram Panchayat Elections) विचार करत भाजपचे 12 नेते राज्याचा दौरा करतील, अशी माहिती आशिष शेलार यांनी ‘टीव्ही 9 मराठी’शी बोलताना दिली.

तसेच, महाविकास आघाडीतील एकही पक्ष आमच्याशी एकटं लढू शकत नाही, हे सिद्ध झालं आहे. त्यामुळे आमची रणनीती ही विजयनीती असेल. पक्षाचे 12 प्रमुख नेते ग्रामपंचायत निवडणुकीत प्रचारासाठी फिरणार आणि महाविकास आघाडीला जागा दाखवून देणार, असा इशारा शेलारांनी दिला.

रोज सरकार पडणार म्हणून ओरडायचे आणि फोडाफोडी करायची, हे दुबळ्यांचे राजकारण आहे. नवी मुंबईमध्ये भाजपचा विजय निश्चित आहे, असा विश्वासही आशिष शेलार यांनी व्यक्त केला.

दरम्यान, लवकरच मुंबई महापालिकेच्या निवडणुका येत आहेत. मुंबई महापालिका जिंकण्यासाठी भाजपने शिवसेनेसमोर तगडे आव्हान ऊभे केले आहे. भाजपकडून निर्माण झालेल्या तगड्या आव्हानामुळे आता शिवसेना मुंबई महापालिका जिंकण्यासाठी कामाला लागली आहे. त्यासाठी शिवसेनेने फक्त मराठी मतदारांवर अवलंबून न राहता मुंबईच्या कॉस्मोपॉलिटीन मतदारांना साद घालायचे ठरवले आहे. याचाच एक भाग म्हणून आता शिवसेनेकडून मुंबईसह राज्यातील गुजराती मतदारांपर्यंत पोहोचण्यासाठी प्रयत्न सुरु झाले आहेत. शिवसेना संघटक हेमराज शाह यांच्यावर गुजराती मतदारांना सेनेकडे वळवण्याची जबाबदारी सोपवण्यात आली आहे.

बातम्यांच्या अपडेटसाठी लाईक करा आमच्या फेसबुक पेजला

MT LIKE OUR PAGE FOOTER