राहुल बजाज सारख्या जेष्ठ, अनुभवी उद्योगपतींना केंद्र सरकारची भीती वाटणे ही चिंताजनक बाब आहे – रोहित पवार

पुणे : 2014 ला केंद्रात मोदींचे सरकार आले. त्यानंतर भारतातील अनेक राज्यांमध्येही त्यांनी विजय मिळवला. विकासाच्या मुद्द्यावरून मोदी सरकारने संपुर्ण भारतवासीयांची मने जिंकून घेतलीत. मोदी यांच्या नावातच उद्येगाला चालणारं व्यक्तीमत्त्व असं वलय त्यांना आहे. शिवाय अहमदाबादला उद्यागधंद्यांमध्ये त्यांनी ज्या उंचीवर नेलं ते पाहता भारतातील मोठमोठ्या उद्योजकांनी मोदींवर डोळेझाक विश्वास ठेवला, परंतु, प्रसिद्ध उद्योगपती राहुल बजाज यांच्या एका वाक्याने देशात खळबळ उडाली आहे. केंद्र सरकारकडे कोणी काहीही बोलू शकत नाही. लोक सरकारवर टीका करण्यास घाबरतात. राहुल बजाजच्या या विधानावरून शरद पवारांचे नातू आणि राष्ट्रवादीचे युवा आमदार रोहित पवार यांनीही काळजी व्यक्त केली आहे.

रोहित पवार म्हणतात, ‘राहुल बजाज यांच्यासारख्या ज्येष्ठ आणि अनुभवी उद्योगपतींना आपल्या केंद्र सरकारची भीती वाटत असेल तर नक्कीच ही चिंताजनक बाब आहे. केंद्र सरकार मधील मंत्री सांगत आहेत त्याप्रमाणे बहुतेक तुम्ही चांगलं काम करत देखील असाल पण उद्योगधंद्यांची वस्तुस्थिती वेगळी आहे. उद्योग क्षेत्रात काम करणाऱ्या लोकांनाच उद्योगधंद्यांच्या खऱ्या समस्या माहीत आहेत, आपल्या अनुभवाच्या जोरावर या समस्या सोडवण्यासाठी काही उपाय देखील हे लोक सुचवू शकतात.’

‘सरकार आणि उद्योगपती यांच्यात जर चांगला संवाद असेल, धंद्यासमोरच्या खऱ्या समस्या जाणून घेऊन त्या सोडवण्याची सरकारची तयारी असेल तर देशाच्या आर्थिक विकासाला नक्कीच गती मिळू शकते पण यासाठी गरज आहे ती उद्योगपतींशी संवाद साधण्याची, त्यांची बाजू ऐकून घेण्याची. मला एकच भीती वाटते ती म्हणजे, आपल्या वरील टीका देखील न ऐकून घेण्याच्या या सरकारचा अहंकारी स्वभाव आपल्या देशालाच घेऊन बुडायला नको.’ अशी भीती रोहित पवार यांनी फेसबूक पोस्टच्या माध्यामातून व्यक्त केली आहे.





राहुल बजाज म्हणाले होते-

सध्या भीतीचं वातावरण आहे आणि लोक सरकारवर टीका करण्यास घाबरतात. सरकार कोणत्याही टीकेचे स्वागत करेल, किंवा खुल्या मनाने स्वीकारेल, असा विश्वास नसल्याचं उद्योजक राहुल बजाज म्हणाले होते.यूपीए-2 च्या काळात आम्ही कुणावरही टीका करु शकत होतो. मात्र, आज तुम्ही चांगलं काम करत आहात. त्यानंतरही आम्ही तुमची खुलेपणाने चिकित्सा करु आणि तुम्ही ती स्वीकाराल हा विश्वासच येत नाही.” असं राहुल बजाज म्हणाले होते.

“कशाचीही भीती बाळगण्याची गरज नाही. नरेंद्र मोदी सरकारवर सातत्याने माध्यमांवर टीका केली जात आहे. परंतु आपण असं वातावरण असल्याचं म्हणत असाल तर आम्हाला ते सुधारण्यासाठी काम करण्याची गरज आहे,” असं उत्तर भाजपाध्यक्ष आणि गृहमंत्री अमित शाह यांनी दिलं होतं.