वंचित बहुजन आघाडीच्या पदाधिकाऱ्याला हद्दपारीची नोटीस

VBA-Court Order

कोल्हापूर : शहर पोलिस उपअधीक्षक प्रेरणा कट्टे यांनी वंचित बहुजन आघाडीचे जिल्हाध्यक्ष अनिल म्हमाणे यांना जिल्ह्यातून दोन वर्षे हद्दपार करण्यात का येऊ नये, अशी नोटीस बजावल्याने खळबळ उडाली आहे. म्हमाणे हे नोटीशीवर म्हणणे मांडण्यासाठी गेले असताना प्रेरणा कट्टे मुंबई हायकोर्टात सुनावणीस गेल्याने त्यांना २५ फेब्रुवारी रोजी म्हणणे मांडण्यासाठी वेळ दिली आहे.

पोलिसांनी म्हमाणे यांना दिलेल्या नोटीशीत म्हटले आहे की, म्हमाणे यांच्यावर शाहूपुरी पोलिस ठाण्यात धमकी, मारामारी, सार्वजनिक संपत्तीचे नुकसान करणे, सरकारी नोकरांवर हल्ला करणे, दरोडा, जमावबंदी आदेशाचे उल्लंघन करणे असे गंभीर स्वरुपाचे गुन्हे नोंद आहेत. एक जानेवारी २०१८ रोजी भीमा कोोगांव येथे घडलेल्या दंगलीच्या पार्श्वभूमीवर कोल्हापूर शहरात तीन जानेवारी २०१८ रोजी आंबेडकरवादी संघटनेने बंद पुकारला होता.

बंदला हिंसक वळण लागल्याने जमावाने अनेक वाहने आणि दुकानांची तोडफोड केली होती. या दंगलीत म्हमाणे यांचा सहभाग असल्याचे दिसून आले असून पोलिसांनी कोर्टात दाखल करण्यात आलेल्या दोषारोपपत्रात त्याची नोंद आहे. म्हमाणे यांच्यामुळे नागरिकांमध्ये भितीचे वातावरण पसरले असून त्यांना कायद्याचा आदर नाही.

भारतीय दंड संविधानच्या प्रकरण १६ आणि १७ मध्ये नमूद केलेली दुष्कृत्ये, गुन्हे केल्याने म्हमाणे हे धोकादायक असल्याचे दिसून आले आहे. त्यांची गुन्हेगारी कृती सार्वजनिक व्यवस्था अबाधित ठेवण्यास बाधक आहे. त्यामुळे शहर आणि आसपासच्या परिसरात मोठ्या प्रमाणात असंतोष निर्माण झालेला असून त्यामुळे सार्वजनिक शांतता बिघडून कायदा व सुव्यवस्थेचा प्रश्न निर्माण होण्याची शक्यता आहे. यामुळे म्हमाणे यांना दोन वर्षे जिल्ह्यातून हद्दपार करण्यााठी नोटीस पाठवली आहे.