‘नीरा देवधर’चे पाणी दुष्काळी भागाला : शरद पवारांना मोठा धक्का

sharad pawar

पंढरपूरः नीरा देवघर धरणाचे पाणी पुन्हा दुष्काळी भागाला देण्याचा आदेश राज्य सरकारने काढला आहे. राज्य सरकारच्या या आदेशामुळे राष्ट्रवादी काँग्रेसचे अध्यक्ष शरद पवार यांना मोठा धक्का असल्याचे मानले जात आहे. सत्तेत असताना कायद्यात बदल करून हे पाणी बारामतीकडे वळवले गेले होते.

हि बातमी पण वाचा : राष्ट्रवादीला दणका देणाऱ्या खा. रणजितसिंहांची जनतेने काढली उंटावरून मिरवणूक

जनता ज्याला राजा मानत होती त्यानेच आम्हाला दहा वर्ष दुष्काळाच्या खाईत लोटले होते. आता मात्र मुख्यमंत्र्यांनी आमच्या मागचा दुष्काळ कायमचा हटविला, अशा उत्स्फूर्त प्रतिक्रिया दुष्काळी भागातील शेतकऱ्यांनी दिल्या आहेत.
बुधवारी झालेल्या बैठकीत याबाबतचा अध्यादेश काढत बारामतीकडे वळवलेले पाणी पुन्हा उजव्या कालव्यातील दुष्काळी सांगोला, माळशिरस, पंढरपूर फलटणला देण्याचा निर्णय घेण्यात आला. या निर्णयानंतर दुष्काळी भागातील शेतकऱ्यांनी फटाके फोडून जल्लोष साजरा केला.

माढ्याचे नवनिर्वाचित खासदार रणजित निंबाळकर यांनी निवडून येताच सांगोला येथील दुष्काळी बैठकीत याबाबत आवाज उठवत जलसंपदामंत्री गिरीश महाजन यांचेकडे यासंदर्भात मागणी केली होती.

२००९ मध्ये अजित पवार जलसंपदामंत्री झाल्यावर त्यांनी करार बदलत दुष्काळी उजव्या कालव्याचे जवळपास ११ टीएमसी पाणी बारामतीकडे डाव्या कालव्यात वळवले होते. माढ्याचे खासदार रणजित निंबाळकर यांनी यासाठी ताकद पणाला लावून हे पाणी दुष्काळी भागाला आणण्याचे प्रयत्न सुरु केल्यावर खुद्द शरद पवार आणि अजित पवार यांनी मुख्यमंत्र्यांची भेट घेतली होती. या भेटीनंतर पाणी पुन्हा बारामतीकडे जाऊ नये, यासाठी सांगोला तालुक्यातील शेतकऱ्यांनी गळफास आंदोलन केले होते.

हि बातमी पण वाचा : पंचगंगा आणि भोगावती नदीवरील उपसाबंदी शिथील

नीरा देवघर धरणाच्या पाण्याचे वाटप करताना पुणे, बारामती पाणी घेत असलेल्या डाव्या कालव्यात ४३ % तर सांगोला, फलटण, माळशिरस आणि पंढरपूर पाणी घेत असलेल्या उजव्या कालव्याला ५७ % पाणी देण्याचा निर्णय झाला होता. आता पुन्हा एकदा पूर्वीच्या कायद्यानुसार हे पाणीवाटप करण्याचा मोठा निर्णय भाजप सरकारने घेतल्याने बारामतीला वळवलेले दुष्काळी भागाच्या हक्काचे पाणी पुन्हा या भागाला मिळणार असल्याने या भागातील लाखो शेतकऱ्यांना मोठा दिलासा मिळून त्यांची तहान भागणार आहे.