मागच्या पाच वर्षांत कुठे, कधी निधी गेला हे पुढच्या अधिवेशनात सांगेन; सभागृहात अजित पवारांचे भाजपला चिमटे

Ajit Pawar

मुंबई :- हिवाळी अधिवेशनाचा आज दुसरा दिवस आहे. सभागृहात उपमुख्यमंत्री अजित पवार (Ajit Pawar) यांनी जीएसटी (GST) परताव्यावरून भाजपला (BJP) चांगलेच चिमटे काढले आहेत. केंद्र सरकारने ३० हजार ५३७ कोटी अजून दिलेले नाहीत, तरीही आम्ही पगार आणि पेन्शन थकवलेले नाही, असं उपमुख्यमंत्री अजित पवार म्हणाले.

कोरोना (Corona) काळात राज्य सरकारने राज्याला कसे सावरले हे सांगताना अजित पवार म्हणाले, सरकार आणि जनता मिळून कोरोनात चांगलं काम करतंय. सरकार कोविडमध्ये हतबल असल्याचा आरोप केला जातोय. सुरुवातीला केंद्र सरकारने सर्व गोष्टी पुरवल्या होत्या. नंतर मात्र प्रत्येक राज्याने हा खर्च करावा, असं सांगितलं. संकट मोठं होतं, उत्पन्न कमी झालं होतं. मंदिरं सुरू करण्यासाठीही राजकारण केलं गेलं. विरोधी पक्षनेते सांगतात, राजकारण करायचं नाही, पण त्यांच्याच सहकाऱ्यांनी राजकारण केलं.

ही बातमी पण वाचा : ‘मला पाडून दाखवा’; अजित पवारांचे मुनगंटीवारांना खुले चॅलेंज

इंग्लंडला दोन-दोनदा लॉकडाऊन करावं लागलं. उद्या काही निर्णय घेतला आणि अंगाशी आला तर विरोधकच म्हणणार यांना थांबता येत नव्हतं का, असा सवालही अजित पवारांनी उपस्थित केला. केंद्राकडून वेळेत निधी आला नाही. जे जे विधिमंडळाने मागितले त्यात कोविड-१९ चा प्रादुर्भाव रोखण्यासाठी निगेटिव्ह प्रेशरसाठी २२ कोटी २६ लाख रुपये खर्च केले. विधानसभा आणि विधान परिषदेच्या सदस्यांच्या निवासस्थानासाठी ८ कोटी रुपये दिलेत.

ही सगळी संकटं असताना वर्षभरात निसर्ग चक्रीवादळाचं संकट आलं. त्याच्यानंतर अतिवृष्टीचं संकट आलं. आपल्याही भागामध्ये पाऊस मोठ्या प्रमाणात पडला. आम्ही कधीही भेदभाव केलेला नाही. शेवटी शपथ घेतल्यानंतर चांद्यापासून बांद्यापर्यंत एक राज्य आहे. मागच्या पाच वर्षांत कुठे, कधी निधी गेला हे मी पुढच्या अधिवेशनामध्ये सांगेन. वडेट्टीवारांनी जे जे प्रस्ताव आणले, ते मुख्यमंत्री आणि उपमुख्यमंत्री म्हणून मी मंजूर केलेले आहेत. धानालासुद्धा आपण ७०० रुपये बोनस दिला. २५०० रुपये एकूण देण्याचा प्रयत्न केला. २८५० कोटी रुपये धान खरेदी करण्यासाठी ठेवलेले आहेत, असंही अजित पवारांनी सांगितलं.

बातम्यांच्या अपडेटसाठी लाईक करा आमच्या फेसबुक पेजला

MT LIKE OUR PAGE FOOTER