गौतम नवलाखा हे देशद्रोहीच सरकारी पक्षाचा युक्तिवाद

Gautam Navlakha

पुणे (प्रतिनिधी) :- एल्गार परिषद आणि भीमा-कोरेगाव दंगलप्रकरणातील संशयित आरोपी आणि बंदी घातलेल्या दहशतवादी डाव्या संघटनेचा कथित सदस्य गौतम नवलाखा हे माओवादी संघटना आणि काश्मीरमधील हिजबुल मुजाहिदीन या दोन्ही संघटनांच्या संपर्कात होते. या दोन्ही संघटनांच्या प्रमुखांची बैठक व्हावी यासाठी ते प्रयत्न करीत होते. त्यांच्या या कारवाया देशासाठी घातक आहेत. त्यामुळे गौतम नवलाखा हे देशद्रोही असल्याचा युक्तिवाद गुरुवारी (ता.७) जिल्हा सरकारी वकील उज्ज्वला  पवार यांनी केला.

नवलाखा यांनी न्यायालयात अटकपूर्व जामिनासाठी अर्ज केला असून त्यावर आज दोन्ही पक्षांचा युक्तिवाद झाला. विशेष न्यायाधीश एस.  आर.  नावंदर यांच्या न्यायालयात या प्रकरणाची सुनावणी सुरू आहे.

नवलाखा यांनी हिजबुल मुजाहिदीन संघटनेशी संपर्क साधून देशाचे किती नुकसान केले? माओवादी संघटनेत किती विद्यार्थ्यांची भरती केली आहे? संघटनेसाठी पैसा कसा उभा केला याचा तपास करायचा आहे. त्यामुळे त्यांना अटक करणे गरजेचे असल्याचे ऍड. पवार यांनी न्यायालयात सांगितले.

नवलाखा यांचे विविध पत्रांमध्ये नाव असले तरी त्यांचा दहशतवादी कृत्यांमध्ये सहभाग असल्याचे कुठेही स्पष्ट झालेले नाही. सत्यशोधन समितीबाबत त्यांनी केलेली कामे हे कायदेशीर आहेत. गेल्या वर्षभरात त्यांना चौकशीसाठी बोलवण्यात आले नाही. त्यामुळे त्यांना अटक करणे गरजेचे नसल्याचा युक्तिवाद बचाव पक्षाच्या वकील रागिणी आहुजा यांनी केला.

दरम्यान, नवलाखा यांना सर्वोच्च न्यायालयाने दिलेले अंतरिम संरक्षण ११ नोव्हेंबर रोजी संपत आहे. तर त्यांच्या अटकपूर्व जामीन अर्जावरील निकाल १२ नोव्हेंबरला होईल, असे न्यायालयाने स्पष्ट केले आहे. त्यामुळे निकाल होईपर्यंत नवलाखा यांना अटक करू नये, असे आदेश न्यायालयाने या प्रकरणाचे तपास अधिकारी सहायक पोलीस उपायुक्त डॉ. शिवाजी पवार यांना दिले आहेत.