मोबाईल कनेक्शनसाठी इ- केवायसीची सक्ती

मुंबई : आता ग्राहकांना नवीन मोबाईल कनेक्शन घेण्यासाठी आधारकार्ड सक्तीचं करण्यात येणार आहे. आयकर विवरण भरण्यासाठी आणि पॅनकार्डसाठी केंद्र सरकारकडून नुकतंच आधार सक्तीचं करण्यात आलं आहे. आता ई-केवायसीच्या माध्यमातून ग्राहकाची पडताळणी होईल, त्यानंतरच नवीन मोबाईल कनेक्शन घेता येणार आहे.

दूरसंचार विभागानं जाहीर केलेल्या नव्या नियमावलीत ई-केवायसीची सक्ती करण्यात आली आहे. फक्त नवीन कनेक्शन घेतानाच नाही, तर जुन्या मोबाईल कनेक्शनधारकांनाही ई-केवायसीच्या माध्यमातून आपला नंबरची पडताळणी करावी लागणार आहे.

प्रीपेड आणि पोस्टपेड सर्वच मोबाईल कनेक्शन धारकांना ई-केवायसी करावी लागणार आहे. त्यासाठी सर्व मोबाईल कंपन्यांना ६ फेब्रुवारी २०१८ ची मुदत देण्यात आली आहे. या तारखेपर्यंत जर पडताळणी करता आलं नाही, तर मोबाईल कनेक्शन बंद केलं जाईल.

नुकतंच सुप्रीम कोर्टानं भारतातील सर्व मोबाईल क्रमांक पडताळणी करण्याचे निर्देश दिले होते. तसंच या नव्या ई-केवायसी प्रक्रियेची माहिती लवकरात लवकर सर्व ग्राहकांपर्यंत पोहोचवण्यासही मोबाईल कंपन्यांना सांगितलं होतं.