शीव उड्डाणपूल सुरू झाल्याने वाहतूककोंडीतून प्रवाशांची सुटका

मुंबई :- गेल्या चार दिवसांपासून बंद असलेला शीव उड्डाणपूल आज अखेर सुरू झाल्यामुळे प्रवाशांची वाहतूककोंडीतून अंशत: सुटका झाली आहे. मात्र, या पुलावरील एक मार्गिकाच सुरू करण्यात आल्याने दुसऱ्या मार्गिकेवर वाहतूककोंडी होण्याची शक्यता आहे. बेअरिंग बदलण्याच्या कामामुळे गेल्या चार दिवसांपासून हा पूल बंद होता. बेअरिंग बदलण्याचे काम पुढील दोन महिने सुरुच राहणार असल्याने येत्या गुरुवारी पुन्हा चार दिवसांसाठी हा पूल बंद ठेवण्यात येणार आहे. त्यामुळे किमान दोन महिनेतरी प्रवाशांना या उड्डाणपुलावरून रखडत प्रवास करावा लागणार आहे.

शीव उड्डाणपुलाचं स्ट्रक्चरल ऑडिट केल्यानंतर या पुलाचे बेअरिंग बदलण्याचा निर्णय घेण्यात आला. प्रत्येक आठवड्यातील चार दिवस हा पूल बेअरिंग बदलण्याच्या कामासाठी बंद ठेवण्यात येणार आहे. गेल्या आठवड्यात चार दिवस हा पूल बंद ठेवण्यात आला होता. त्यामुळे या मार्गावर वाहतुकीची मोठी कोंडी झाली होती. दक्षिण मुंबईकडे जाणारी मार्गिका अद्यापही बंद ठेवण्यात आलेली आहे. त्यामुळे या मार्गावर मोठी वाहतूक कोंडी होण्याची शक्यता आहे. या पुलाच्या पहिल्या टप्प्याचे काम पूर्ण झाल्यानंतर आज पहाटे सहा वाजता या उड्डाणपुलावरील एक मार्गिका सुरू करण्यात आली आहे.

मुंबई वाहतूक विभागाकडून या कामासाठी एकूण आठ ट्रॅफिक ब्लॉक मंजूर करण्यात आले आहे. यापैकी, पहिला ब्लॉक १४ फेब्रुवारीला पहाटे ५ ते १८ फेब्रुवारी पहाटे ६ वाजेपर्यंत पार पडला असून पुढील ब्लॉक २० ते २४ फेब्रुवारी या कालावधीत असेल. महाराष्ट्र राज्य रस्ते विकास महामंडळाच्या वतीने हे काम हाती घेण्यात आले आहे. या कामामुळे उड्डाणपुलाखाली भागात वाहतुककोंडी होणार नाही यासाठी वाहतूक पोलिसांकडून विशेष काळजी घेण्यात येणार आहे, असे सूत्रांनी सांगितले.