काँग्रेसच्या सभागृह नेत्यावर मारहाण प्रकरणी गुन्हा दाखल

मारहाण - काँग्रेस -गुन्हा दाखल

कोल्हापूर : कनान नगरमध्ये दुकानाच्या चाव्या देण्याच्या कारणावरून दाम्पत्याला लाकडी बॅटने मारहाण केल्याप्रकरणी महापालिकेतील काँग्रेसच्या सभागृह नेत्यासह चौघांवर शाहूपुरी पोलिस ठाण्यात गुरुवारी गुन्हा दाखल झाला. याबाबतची फिर्याद जखमी दिलावर रमजान सय्यद (वय ३२, रा. कनाननगर) यांनी दिली. सभागृह नेते दिलीप पोवार, त्यांची पत्नी, सून आणि सागर पोवार अशी संशयितांची नावे आहेत.

शाहूपुरी पोलिसांनी दिलेल्या माहितीनुसार, सय्यद यांचे कनाननगर परिसरात स्क्रॅप विक्रीचे दुकान आहे. काही कारणांमुळे पोवार आणि सय्यद यांच्यात वाद झाला होता. या वादातून पोवार यांनी या दुकानाच्या चाव्या काढून घेतल्या होत्या. दुकानाच्या चाव्या मागण्याच्या कारणावरून दिलावर सय्यद व त्यांची पत्नी सायला या पोवार यांच्या कनाननगर येथील घरासमोर रात्री नऊ वाजता गेले. त्यांनी स्क्रॅप दुकानाच्या चाव्या देण्याची विनंती केली. मात्र त्यांना पाहून पोवार कुटुंबीयांनी शिवीगाळ करण्यास सुरुवात केली. त्यांना दारातून हाकलून देण्याचा प्रयत्न केला. या प्रकाराला सय्यद यांनी विरोध करताच दिलीप पोवार यांनी त्याचे डोके आपटले.

त्यानंतर सागर पोवार लाकडी बॅटन घेवून घरातून पळत आला. त्याने दिलावर याच्या कपाळावर जोराने बॅटन मारल्याने तो जखमी झाला. सय्यद यांची पत्नी सायला हिला पोवार कुटुंबीयांना शिवीगाळ करुन लाथाबुक्‍क्‍यांनी मारहाण केली. या मारहाणीत सायला जखमी झाल्या. दरम्यान, याप्रकरणी जखमी सय्यद यांनी दिलेल्या फिर्यादीनुसार दिलीप पोवार, त्यांची पत्नी, सून व मुलगा सागर पोवार अशा चौघांवर पोलिस ठाण्यात गुन्हा दाखल झाला. सय्यद यांच्या डोक्‍याला दुखापत झाली आहे. या घटनेनंतर परिसरात मोठा तणाव निर्माण झाला. पोलिसांनी वेळीच हस्तक्षेप केल्याने पुढील अनर्थ टळला.