‘आम्ही अपघाताने सत्तेपासून बाहेर, मात्र अधिक काळ मागे राहणार नाही’ – फडणवीस

Fadnavis

पुणे : आम्ही अपघाताने सत्तेपासून वंचित राहिलो, मात्र आम्हाला फार काळ कोणी रोखू शकणार नाही, असा विश्वास विरोधी पक्षनेते आणि माजी मुख्यमंत्री देवेंद्र फडणवीस यांनी व्यक्त केला. ते इंदापूरमध्ये बोलत होते.

यावेळी ते म्हणाले की, हर्षवर्धन पाटील आणि माझादेखील अपघाताने पराभव झाला आहे. मात्र चिंता करण्याचे काहीच कारण नाही, फार काळ कोणी आपल्याला मागे ठेऊ शकत नाही.

ज्यांच्यासोबत होतो त्यांनी जनादेशाला महत्त्व दिले नाही. ७० टक्के जागा आम्ही जिंकूनही ४० टक्के जागा काबीज करणारे एकत्र येऊन मेरीटमध्ये आले आणि त्यांनी सत्ता स्थापन केली. पण ही सत्ता फार काळ काही चालणार नाही, असा दावा देवेंद्र फडणवीस यांनी केला.

इंदापूर येथे माजी मंत्री हर्षवर्धन पाटील यांच्या निवासस्थानी माजी मुख्यमंत्री देवेंद्र फडणवीस यांनी कार्यकर्त्यांशी संवाद साधला. यावेळी माजी उपमुख्यमंत्री विजयसिंह मोहीते-पाटील, माजी सहकारमंत्री हर्षवर्धन पाटील, सुभाष देशमुख, माजी राज्यमंत्री संजय उर्फ बाळा भेगडे, आमदार राहुल कुल, राम सातपुते आदींसह कार्यकर्ते उपस्थित होते.