भुजबळ सर्व पक्षीय होवो, राज्यपालांची भुजबळांना भाजपमध्ये येण्याची अप्रत्यक्ष ऑफर

Governor Bhagat Singh Koshyari - Chhagan Bhujbal

नाशिक : सुरगाणा तालुक्यातील गुलाबी गाव (भिंतघर) येथील एकात्मिक आदिवासी जिल्हा प्रकल्पाच्या जिल्हा वार्षिक आदिवासी उपयोजना अंतर्गत बांधलेल्या आदिवासी सांस्कृतिक भवनाचे लोकार्पण राज्यपाल भगतसिंह कोश्यारी (Governor Bhagat Singh Koshyari) यांच्या हस्ते करण्यात आले. यावेळी राष्ट्रवादीचे (NCP) नेते छगन भुजबळ (Chhagan Bhujbal) यांना जाहीर कार्यक्रमातून भाजपमध्ये (BJP) येण्याचं आवतन दिल्यानंतर राज्यपाल भगतसिंह कोश्यारी यांनी थेट राज्य सरकारवर टीका केली आहे. सरकारचे मंत्रीही माझ्याकडे मागण्या करतात. मग सरकार नेमकं काय करतं आहे? असा सवाल त्यांनी यावेळी उपस्थित केला.

याप्रसंगी विधानसभेचे उपसभापती नरहरी झिरवळही उपस्थित होते. यावेळी झिरवळ यांनी राज्यपालांकडे या भागाची समस्या मांडली. या भागात भरपूर पाऊस पडतो. पण सर्व पाणी समुद्राला वाहून जातं. पाणी अडवण्यासाठी तुम्ही मदत करा. हा भाग समृद्ध होईल, असं झिरवळ म्हणाले. झिरवळ यांच्या मागणीचा हाच धागा पकडून राज्यपालांनी राज्य सरकारला लक्ष्य केले. झिरवळ सरकारमध्ये आहेत. पण ते माझ्याकडे मागणी करतात. मग राज्य सरकार काय करतं आहे ? धावपटू कविता राऊतला नोकरी देण्यात आली नाही. क्रीडामंत्री केवळ नोकरी देण्याची भाषा करत आहेत. काहीच करत नाही. मग सरकार नेमकं काय करतंय, असा सवाल राज्यपालांनी केला.

शहरं झपाट्याने वाढली. त्यांचा विकासही झाला. मात्र आदिवासी कायम दुर्लक्षित राहिला आहे. गरजा कमी पडल्या तरी अडचणी असतात. तरीही आदिवासी कायम आनंदी राहिला आहे. घरासाठी आदिवासी सरपण तोडत असतील तर वनाधिकाऱ्यांनी त्यांना खुशाल सरपण तोडू द्यावं, अशा सूचना करतानाच आदिवासी समाजाने मुख्य प्रवाहात यायला हवं, असं आवाहनही त्यांनी केलं.

भुजबळ सर्व पक्षीय होवो

दरम्यान, भगतसिंह कोश्यारी यांच्या हस्ते सटाणा येथे संत शिरोमणी देवमामलेदार स्मारकाचं उद्घाटन करण्यात आलं. यावेळी त्यांनी छगन भुजबळांना भाजपमध्ये येण्याची अप्रत्यक्ष ऑफर देवून खळबळ उडवून दिली. माझ्यासाठी सगळेच देवमामलेदार आहेत. त्यामुळे तुम्हा सर्वांना मी प्रथम प्रणाम करतो. भुजबळांनी संपूर्ण बळ लावलं म्हणून हे स्मारक होत आहे. त्यामुळे भुजबळही सर्वपक्षीय होवोत अशी देवमामलेदारांना प्रार्थना करा म्हणजे सर्व भांडण संपून जाईल आणि तुम्हाला भरघोस निधी मिळेल, असं सांगत राज्यपालांनी थेट भुजबळांना भाजपमध्ये येण्याची ऑफर दिली. त्यामुळे आश्चर्य व्यक्त केलं जात आहे.

प्रभू रामचंद्रासोबत वानर नसते आणि छत्रपती शिवाजी महाराजांसोबत मावळे नसते तर लक्ष्य शत्रूंवर विजय मिळाला नसता. त्यामुळे आपण देखील एकत्र मिळून काम करायला हवं, असं सांगतानाच नगराध्यक्ष सुनील मोरे यांनी थोडा प्रयत्न केला तर भुजबळांचे बॉस असलेले मुख्यमंत्री उद्धव ठाकरे, पर्यटन मंत्री आदित्य ठाकरे यांचा देखील आशीर्वाद त्यांना मिळेल, असा चिमटाही त्यांनी काढला होता.

बातम्यांच्या अपडेटसाठी लाईक करा आमच्या फेसबुक पेजला

MT LIKE OUR PAGE FOOTER