अनिल अंबानींच्या कंपनीत घोटाळ्याचा संशय

५५०० कोटींची हेराफेरी

Anil Ambani

मुंबई :- अनिल अंबानी यांची रिलायन्स कम्युनिकेशन्स ही कंपनी आधीच संकटांचा सामना करीत आहे. कंपनीच्या डोक्यावर ४५ हजार कोटी रुपयांचे कर्ज आहे. तसे असताना आता रिलायन्स ग्रुपच्या अन्य कंपन्यांच्या व्यवहारात तब्बल ५,५०० कोटी रुपयांची हेराफेरी झाल्याचा संशय आहे. स्टेट बँकेने तसे म्हटले आहे.

आरकॉम, रिलायन्स टेलिकॉम लिमिटेड आणि रिलायन्स टेलिकॉम इन्फ्रास्ट्रक्चर लिमिटेडमध्ये फंडाच्या रमकेच्या देवाणघेवाणीदरम्यान पैशांचे संशयास्पद व्यवहार, कर्जाबाबतची कथित एव्हरग्रीनिंग आणि निनावी कंपन्यांशी व्यवहार झाल्याचे स्पष्ट होत आहे. यात रिलायन्स ग्रुपच्या संचालकांचा सहभाग असल्याचेही स्पष्ट झाले आहे, असे स्टेट बँकेचे म्हणणे आहे. याच रिलायन्स ग्रुपचे आधीचे नाव अनिल धीरुभाई अंबानी ग्रुप (एडीएजी) होते.

तपासादरम्यान मे २०१७ पासून ते मार्च २०१८ दरम्यान झालेल्या पैशांच्या व्यवहारांवर विशेष लक्ष देण्यात येत आहे. यात हजारो नोंदीपैकी तीन नोंदी संशयास्पद आढळून आल्या. त्यांचा संबंध फंड वळवण्याशी असू शकतो अशी शक्यता आहे. झालेल्या व्यवहारांची प्रामाणिकता तपासण्यासाठी अधिक खोलात जाऊन तपास करण्यावर कर्जपुरवठादार विचार करत आहेत. एसबीआयने फंड पुरवठ्याबाबत अभ्यास करण्यासाठी नोव्हेंबर २०१७ मध्ये बीडीओ या अकाउंटिंग कंपनीची मदत घेतली होती.

नेटिझन या कंपनीला मे २०१७ मध्ये ४ हजार कोटी रुपयांची आगाऊ रक्कम मिळाली होती. ही रक्कम नेटिझनला रिलायन्स ग्रुपच्या अनेक कंपन्यांकडून अनेक ट्रान्झॅक्शनच्या माध्यमातून मिळाली होती. इतक्या मोठ्या रकमेमुळेच संशय बळावला. यानंतर देण्याची प्रक्रिया संपल्याचे दाखवण्यात आले. कंपनीच्या ऑडिटर्सनी कंपनीच्या व्यवहारांमध्ये या देवाणघेवाणीची माहिती द्यायला हवी होती, मात्र ती दिली गेली नाह, असे सूत्रांचे म्हणणे आहे.

ग्रुपच्या एका कंपनीला इंटर-कॉर्पोरेट डिपॉझिटच्या रुपात ६०० कोटी रुपये देण्यावर देखील प्रश्न उपस्थित केले गेले आहेत. हे प्रेफरेन्शियल ट्रान्झॅक्शन असू शकते असा आरोप तपासादरम्यान लावण्यात आला आहे.