कोल्हापूर : इचलकरंजीतील 45 नगरसेवकाना दंड

इचलकरंजी नगरपरिषद

कोल्हापूर : सभागृहात सभा न घेण्याचा आदेश असतानाही तो न पाळता सुरक्षित अंतराच्या नियमाचा भंग करणाऱ्या इचलकरंजीच्या नगराध्यक्षा, उपनगराध्यक्षासह ४५ नगरसेवकांना प्रशासनाने दणका दिला. या सर्वांना मुख्याधिकारी संतोष खांडेकर (Santosh Khandekar) यांनी दंडाची नोटीस पाठवली आहे.

करोना संसर्गाच्या पार्श्वभूमीवर स्थानिक स्वराज्य संस्थेच्या सभा व्हिडिओ कॉन्फरन्सींगव्दारे घेण्याचे आदेश राज्य सरकारने दिले आहेत. करोनाला रोखण्यासाठी हा निर्णय घेतला गेल्याने सध्या नगरपालिका, महापालिका, जिल्हापरिषदेच्या सभा ऑनलाईन होत आहेत. पण सरकारच्या या आदेशाला केराची टोपली दाखवत इचलकरंजी नगरपालिकेतील लोकप्रतिनिधीनी एका नाट्यगृहात सभा घेतली. पण हा मनमानी कारभार त्यांना भोवला आहे.

या नाट्यगृहात व्हिडिओ कॉन्फरन्सींगची यंत्रणा कार्यान्वित करण्यात आली होती. सभेसाठी काही नगरसेवक प्रत्यक्ष उपस्थित राहणार होते, तर काहीजण घरातूनच ऑनलाइन सहभागी होणार होते. पण सभा सुरू झाल्यानंतर काही वेळात तांत्रिक अडचणी येऊ लागल्या. कुणाचा आवाज येईना, तर कुणाचा चेहरा दिसेना. यामुळे नगरसेवक संतप्त झाले. सर्वांनी तक्रारी सुरू केल्या. सभेत महत्त्वाचे विषय असल्याने अखेर काही नगरसेवकांनी थेट नाट्यगृह गाठले. त्यामुळे तेथे गर्दी झाली. यामुळे सुरक्षित अंतराच्या नियमाचा फज्जा उडाला. सरकारच्या आदेशाचा भंग केल्याने प्रशासनाने त्याची दखल घेतली. यामुळे मुख्याधिकारी खांडेकर यांनी नगराध्यक्षा अलका स्वामी यांच्यासह उपनगराध्यक्ष व ४५ नगरसेवकांना दंडाची नोटीस पाठवली आहे. प्रत्येकांनी दोनशे रूपये दंड भरण्याची शिक्षा मुख्याधिकाऱ्यांनी केल्याने इचलकरंजी नगरपालिका वर्तुळात खळबळ उडाली आहे.

बातम्यांच्या अपडेटसाठी लाईक करा आमच्या फेसबुक पेजला

MT LIKE OUR PAGE FOOTER